నక్కపల్లి: ఆంధ్రప్రదేశ్లో స్థానిక సంస్థల ఎన్నికల ప్రచారం ఊపందుకుంది. ఇందులో భాగంగా నక్కపల్లి మండలం దేవవరం కూటమి ఎంపీటీసీ, ఎంపీపీ అభ్యర్థి కొప్పిశెట్టి హేమలత నామినేషన్ దాఖలు కార్యక్రమం అత్యంత వైభవంగా నిర్వహించారు. ఈ కార్యక్రమానికి రాష్ట్ర హోంమంత్రి వంగలపూడి అనిత ముఖ్య అతిథిగా హాజరై అభ్యర్థికి సంపూర్ణ మద్దతు తెలిపారు.
భారీ ర్యాలీగా నామినేషన్ కేంద్రానికి..
శుక్రవారం దేవవరం నుంచి కూటమి పార్టీలకు (తెదేపా, జనసేన, భాజపా) చెందిన ముఖ్య నాయకులు, కార్యకర్తలతో కలిసి అభ్యర్థి కొప్పిశెట్టి హేమలత నక్కపల్లి చేరుకున్నారు.
స్థానిక బస్టాండ్ నుంచి మండల పరిషత్ కార్యాలయం వరకు కూటమి శ్రేణులు భారీ సంఖ్యలో తరలివచ్చి ఘనంగా నామినేషన్ ర్యాలీ నిర్వహించారు.
ఈ ర్యాలీలో హోంమంత్రి అనిత స్వయంగా పాల్గొని అభ్యర్థితో పాటు నడిచారు. నామినేషన్ పత్రాలు దాఖలు చేసిన హేమలతకు మంత్రి అభినందనలు తెలిపారు.
also read - విజయనగరం: కూటమి అభ్యర్థుల విజయాన్ని కాంక్షిస్తూ ఎమ్మెల్యే అదితి గజపతిరాజు ముమ్మర ప్రచారం!
కూటమి అభ్యర్థులను గెలిపించాలని పిలుపు
ఈ సందర్భంగా హోంమంత్రి అనిత మాట్లాడుతూ.. స్థానిక సంస్థల ఎన్నికల్లో ప్రజలందరూ కూటమి అభ్యర్థులకు భారీ మద్దతుగా నిలవాలని కోరారు. ప్రభుత్వ సంక్షేమ పథకాలను ప్రజల్లోకి తీసుకువెళ్తూ, గ్రామస్థాయిలో అభివృద్ధిని సాధించేందుకు కూటమి అభ్యర్థుల గెలుపు ఎంతో కీలకమని పేర్కొన్నారు.
ఈ కార్యక్రమంలో మూడు పార్టీలకు చెందిన స్థానిక నాయకులు, పెద్ద ఎత్తున కార్యకర్తలు, అభిమానులు ఉత్సాహంగా పాల్గొన్నారు.
